برج الجدي : طول بالك ليش مستعجل بكره بتكبر وبيطولوا قرونك وبتصير تيس تمام ويمكن تصير مسؤول. لاتخشى شيئا ً مستقبلك مضمون .
برج العقرب : شو قصتك ياعقرب .. حل عن برج البغل .. لساك نازل لسع فيه .. وهوه نازل ترفيس بالبشر . عاملين زي اسرائيل وأمريكا .. اسرائيل بتلسع وأمريكا بترفس بدول العالم .
برج الجوزاء : لايمتى راح تبقوا لازقين ببعض .. وسعوها شوي .. مثل المسؤولين والكرسي .. لازقين .. لازقين .. وبعدين بقااااه .. حلوا ياااه .
برج الحوت : بلعت الدنيا ياابن الحرام .. كنت مسؤول وشفطت كل شي .. ماخليت فيها .. وطلعت من المسؤولية .. بدك تعمللي تجارة وانت مابتفهم فيها.. شو مفكر .؟ ماخليتوا فيها شي . حتى البحر بح .. مابقى فيه سمك .
برج الحمل : دير بالك ياحمل .. وين مفكر حالك بسويسرا .. ولك حتى بسويسرا صار فيها ذئاب .. روح تضبضب بالبيت ولاتطلع بالشارع وإللا بترجع عالشاسيه لاجلد ولا لحم ويمكن يقرقشوا العظم .
برج السرطان : ولك بدك تعيش أعوج وتموت أعوج .. على الأقل احكي عدل وامشي أعوج .. متلك متل بعض المسؤولين .. خليك هيك يمكن تصير وزير أو رئيس وزارة .في إحدى الدول العربية السعيدة. ليش مستغرب .
برج الثور : بدك تظل طول عمرك أحمق .. بس تشوف شرشف أحمر بتصير تبحت بالأرض وتجهز قرونك وبعدين وراه .. ولك مش كل أحمر تنورة . صحيح قلنا للحمار حمار .. أتاري انك أحمر .
برج القوس : روح اتلهي .. قال .. قوس ..قال .. وانت وترك مرتخي عالأخير .. انقطع حيلك وسهمك بيوقع قدامك .. أي ولك .. ماراح تصيب الحيط .. بلا قوس بلا نيله . تضرب .. زيك زي الجامعة العربية . مقطوع حيلك .
برج الأسد : شد حيلك شوي .. واللا الغابة بتفلت .. وكلو بياكل كلو .. لاتصدق الثعالب اللي بتتمسكن قدامك ومسيحة الجوخ اللي بيقلبوا الأسود أبيض والأبيض أسود .. الحالة ماعاد تتحمل أكثر . الغابة تأخر تنظيفها كتير ..؟. أوعى تصدق .. مافي تنظيف ولاتصليح .
برج العذراء : ولك لأيمتى بدك تظلي عذراء .. دقيتي أبواب الخمسين ولسه بتقولي عذراء .. ليش الخجل .. قولي عانس وخلصينا .. انت ِ زي كونداليزا. معقدة وعقدت العالم معاها . ماكان يلتقى زعيم عربي يتزوجها ويخلصنا ..على الأقل بيرحم زملاؤه المسؤولين من تعقيدها وشخطها فيهم . شوفي ياعذراء.. اذا ماتزوجتي .. السنة القادمة بدنا نسميكي برج العانس .
برج الدلو : فكرناك دلو بصحيح طلع اسفلك مهتري .. عبيناك مي .. زربت الله لايعطيك عافية .. متلك متل المسؤولين ..مابيلحقوا يستلموا الادارة أو الوزارة .. حتى تبلش تزرب وتخسر الميزانية .. لأ,.. وإذا ضاقت الحالة عليهم بيهربوا وبيعملوا معارضة ..؟؟ شو هالزمن اللي مبخوش ..؟!!
برج الميزان : من أول ماوصلت لبلادنا العربية صرت مايل .. حتى على قوس العدالة رسموك مايل .. وانت مبسوط .. مش عارف شو مخبيلك .. وكمان صرت شفيط . اذا اللي حاملك أعمى .. كيف راح توزن صح .؟.
برج الحمار : نيالك ياحمار .. انت الوحيد اللي راح تضبط معك .. طلعت أفهم بكتير من رئيس أكبر دولة بالعالم .. هو غبي .. بس انت حمار .. والحمار أفضل من الغبي .. على الأقل عملوك شعار حزب .. وبالتالي فازت الحمير .
جايينا يوم نحسدك على عيشتك .. مش مطول .. قريبا ً .
برج البغل : رفض طلب انتسابك الى قائمة الأبراج .. أنصحك بالتحالف مع الحكومة اللبنانية الاحتيالية .. ربما توسطوا لك عند كونداليزا أو عند ليفني.. وهي ستقوم بفرض انتسابك .. يمكنك أن تراجع السفارة الأمريكية في عوكر / بيروت اذا كنت مستعجل .. على الأقل بترفس عالطريقة الأمريكية وعندها بيدعموك متل السنيورة وسعدو .
- الخنزير: تقدم بطلب للانضمام الى قائمة الأبراج .. بعد أن استقال من الابراج الصينية .. بعض المسؤولين العرب تبنوا قضيته وسيتم عرضها على الأمم المتحدة في أقرب جلسة . . ويمكن يقبلوه . اذا قبل يعمل شاهد ماشفش حاجة قدام لجنة التحقيق الدولية.. ضد سوريا .. ويقبض دفعة كبيرة من سعدو . .. روح تضرب وانت شبه وليد جنبلاط .
موضوع: توقعات الابراج 
